Nos Hugo, officialis et canonicus Masticonensis, notum facimus universis presentes litteras inspecturis, quod Margareta, uxor Guichardi de Dardre, domicelli, coram nobis confitetur de mandato dicti G. mariti sui expresso, venerabili in Christo patri Yvoni, Dei gratia abbati Cluniacensi, nomine ecclesie Cluniacensis, res infrascriptas de suo franco allodio existentes, ut asserit, constituisse feodales, scilicet domum suam de Escorceles et quicquid habet et habere potest quoquo modo juris et actionis et dominii in eadem villa de Escorceles, et in parrochia Sancti Petri Veteris, et easdem res a dicto abbate nomine ecclesie Cluniacensis in feodum accepisse. In reconpensationem cujus acceptionis in feodum dicta Margareta confitetur coram nobis se recepisse a dicto abbate duodecim libras Viennensium in pecunia numerata, et de ipsis rebus constitutis feodalibus fecisse homagium et fidelitatem dicto abbati nomine ecclesie Cluniacensis supradicte. Hanc autem constitutionem et in feodum acceptionem dictus Guichardus coram nobis acceptat, laudat et approbat, promittentes dicti Guichardus et Margareta coram nobis, per juramentum super sancta Dei evangelia prestitum, se contra dictam constitutionem et in feodum acceptionem per se vel per alium non venire nec contravenire volenti consentire nec permittere dictum abbatem et ejus successores super dictis rebus feodalibus ab aliquo indebite molestari; promittunt etiam dicti conjuges, sub prestito juramento coram nobis et sub omnium bonorum suorum obligatione, tradere et reddere dicto abbati vel ejus mandato infra proximum festum Natalis Domini litteras domini episcopi Matisconensis sigillo ejusdem sigillandas super dictis conventionibus seu contractu conficiendas, prout eidem abbati melius et utilius videbitur expedire. Renunciantes autem dicti conjuges per juramentum coram nobis in hoc facto ex certa scientia exceptioni non numerate peccunie nec recepte, doli et in factum, subsidio dotis et ypothece privilegio, legi Julie de fundo dotali non alienando et omni auxilio et beneficio jurium canonici et civilis. In cujus rei testimonium, ad preces dictorum conjugum, sigillum nostrum presentibus litteris apponimus. Actum et datum V^o idus octobris, anno Domini M^o CC^o LX^o tercio. (Fragment de sceau)